Thursday, September 29, 2016

هى كذلك إلى أن يثبت العكس ..؟!

عقب زرع دولة إسرائيل فى وسط العالم العربى بسنوات قليلة ظلوا حتى الآن يفخرون فى كل المنتديات الدولية بأنهم الديموقراطية الوحيدة فى منطقة الشرق الأوسط .. صفعات متتالية على وجه حكام المنطقة كلهم بلا استثناء وتثبيتا لمكانتها فى قلب أمريكا التى تتبناها دون قيد ولا شرط وتجاهر بذلك .
كان بإمكان العرب - لو أرادوا - أن يتحدوا ويختاروا الديموقراطية نظاما للحكم يمنح شعوبهم حق اختيار حاكمهم من خلال انتخابات حرة نزيهة وإنشاء دول تعتمد على مؤسسات دستورية تراقب وتحاسب وتشرع القوانين .. ولكن...هم اختاروا القمع والقهر وفرض الإرادة واستسهلوا ذلك تأمينا لنظم حكمهم بإرادة فردية مطلقة.
لم يعد ذلك ممكنا الآن بعد أن تعقدت الأمور وتغير المسرح الدولى وأصبح لايعبأ بما يجرى فى المنطقة سوى مايمس أمن إسرائيل ويهدد وجودها ولطالما استأنسوا حكام المنطقة وطبَّعوهم لكى يخدموا مصالحهم .. بل إنهم يتسابقون الآن لكسب ود إسرائيل وعقد الإتفاقات معها خوفا منها وإرضاء لأمريكا.
كل التحاليل التى أقرأها عن رعاية أمريكا للإرهاب تخطئ التقدير .. الموضوع ليس بن لادن ولا داعش وأمثالهما .. أمريكى ترعى الإرهاب منذ عام 47 ممثلا فى إسرائيل .. أطلقت يدها فى تقتيل الفلسطينين وتهجيرهم والإستيلاء على أرضهم وتدمير البنية التحتية لجزء الأرض الذى يعيشون عليهم من دولتهم .. وكل حكام إسرائيل ورؤساء وزرائها منذ الحين ينطبق أى تعريف للإرهاب.
تفرغ العرب لخلافاتهم على الزعامة وجمدوا عمل الكيان المنظم الوحيد الذى كان يمكن أن يجمعهم على رأى أو على الأقل يجعلهم قوة اقتصادية جبارة يعمل لها ألف حساب خاصة وأن الله قد حبا المطقة بثروات طبيعية يسعى لامتلاكها كل الدول.
ماذا ستقولون لرب العباد حين تلقونه يوم الحساب ؟

Monday, September 26, 2016

صفات القائد الغبى

عملنا ونحن شباب في وظائف متعددة ومع أصناف مختلفة من القيادات (سميهم قادة سميهم مديرين المفروض أنهم يقودون فرق عمل) .. محدش يحاول يعملى فيها "فُنْط" ويقوللى هناك فرق بين القائد والمدير عشان أن بأدرس الحاجات دى.
تسألنى طب عايز إيه ؟ أقولك عايز أحط مواصفات القائد الغبى اللى طبعا لازم يكون فاشل ومُعَوِّق ومُحْبِط لمن يقودهم .. خد عندك:
...
1- يعمل بلا خطة مسبقة أو برنامج عمل عشان هو مابيعرف ومابيفهمش أصلا يعنى إيه برنامج
2- يستبعد كل من يفهم حتى لاينكشف أمره وينفضح غباؤه
3- يقرب منه من هم أكثر منه عباءا لكى يظلوا ليل نهار يسبحون بحمده
4- لايركز على موضوع حين يتحدث حتى لايحاسبه أحد على ماقال أو التزم به
5- يحاول باستمرار أن يلعب دور الحكيم الذى بيده مفاتيح كل الحلول
6- يقول كلام كبير لايفهم معناه ولكنه يعجبه
7- يتجنب الدخول في مناقشات جادة حتى لايصطدم بمنطق العقل في تحليل الأمور
8- يستجدى التأييد من خلال اللعب على عواطف من ينخدعون في مظهره أو يتقربون منه لتحقيق مصالح شخصية.
9- يتباهى بقوة منصبه ويذبح قطة أمام القرد كل حين حتى يظل يخشاه ويطيعه وينفذ كل مايطلبه منه.
10- يظن أن كل من حوله أغبياء لايفهمونه ولن يصلوا إلى مستوى ذكائه الخارق

لم يكن هناك داع ل 25 يناير

ماله بقى نظام مبارك حد يقوللى؟
الراجل قاعد في مستشفى فايف ستارز من يوم مامشى، وولاده ماشاء الله بيحضروا حفلات ومهيصين والهانم قاعدة في القصر اللى احتلته من يوم مابقت سيدة مصر الأولى ودهنته أبيض عشان تبقى زى أي سيدة أولى بصحيح، والفلوس اللى اتهربت حتفضل بره للزمن محدش عارف واللى اتزنق سابلهم كام مليون واتصالح وصافى يالبن حليب ياقشطه ، ورموز حكمه كلهم قاعدين على الساحل الشمالى كل واحد قدام القصر بتاعه المبني على البحر على طول أو على لسان أو جوه حَنَك .. حتى نظيف حيرجع يدرس في كلية الهندسة تانى .. والجيش قال عنكم انتم إحنا حنشيل البيعه .. الراجل بتاعنا وغلط 30 سنة .. مش عايزينه ؟ ولا تزعلوا نفسكم حنجيبلكم واحد تانى غيره ونوعدكم إنه مش حيقعد 30 سنة.
يبقى 25 يناير دى كان لزومها إيه؟ والعالم اللى ماتت دى ماتت ليه؟ ماتردوا ساكتين ليه؟

تجديد الخطاب الدينى فى مصر

بالعقل كده:
عشان ماتضحكوش على الناس وعلى نفسكم (لو صدقتوا اللى بتقولوه) هو مين بالضبط اللى حيطور الخطاب الدينى؟ مشيخة وجامعة الأزهر ولا وزارة الأوقاف ولا كلهم مع بعض؟
طيب اسمحولى بسؤال ساذج لو جاوبتوا عليه يبقى يمكن فيه أمل: الناس اللى بيقعدوا ورا المقرئ اللى بيقعدوا ورا القرآن فى الراديو (يعنى من الإذاعة المصرية الرسمية) زى الكورس اللى ورا المطرب يشجعون ويستحسنون ويقولون الله والله يفتح عليك عمال على بطال حتى لو كان المقرئ يرتل آيات العذاب وهول يوم القيامة وجهنم والعياذ بال...له.
والأكثر من 45 ألف زاوية بكل حارة وشارع وتحت المنازل وفى الشقق ويرفع منها الآذان من قبل أناس لايعرفون الفرق بين القاف والكاف ولا الصاد ولا السين ( يعنى الآذان بيرفع غلط أصلا) ثم يؤم المصلين فيها أى عابر سبيل يخطئ فى قراءة المعوذتين.
إذا كنتم كلكم ووراكم الدولة بكل أجهزتها العسكرية والشرطية عاجزين عن منع هذا التهريج والسيرك الدينى الذى يعرض ألعابه 5 مرات كل يوم ويخصص يوم الجمعة لليلة الكبيرة، يبقى ممكن حد عنده شوية عقل ممكن يصدق إنكم مؤهلين لمهمة تطوير الخطاب الدينى؟